Heshiiska kirada
Heshiiska Kiradu waa dukumintiga aad saxiixdid marka kiradaadu bilaabmanayso. Wuxuu ku siinayaa faahfaahinta heshiiska u dhexeeya adiga iyo Degmada Hackney. Qaybtaani waa isagii oo kooban.
Weydiimihiinii oo laga jawaabay
Maxaa dhacaya haddii aan jabiyo heshiiska kirada?
Heshiiska Kiradu waa heshiis sharciyeysan oo u dhexeeya adiga iyo Dawladda Hoose. Marka aad saxiixdo waxaad oggolaatay Shuruudaha Kirada ee heshiiska lagu faahfaahiyay. Shuruudahaasina waa xuquuqda iyo waajibaadka ay tahay in adiga iyo Degmaduba aad dhowrtaan. Haddii aad heshiiska jabisid waxaan ka wada hadlaynaa sidii aad wax u hagaajin lahayd. Haddii dhibaatada la xallin waayo, waxaa suurogal ah inaan arrinka maxkamad u gudbino. Eeg Kirada gurigaaga.
Ma noqon karnaa kireystayaal wadaag ah?
Sida caadiga ah waxaan kirada wadaagga ah siinaa lammaanayaasha isla deggan, hase yeeshee waad u codsan kartaa qof kasta oo qaangaar ah oo kula nool inuu kiro wadaag kula noqdo. Kiro wadaagayaasha waxaa wada saaran mas’uuliyadda kiro bixinta iyo dhowrista shuruudaha Heshiiska Kirada. Eeg Isbeddelka qoyska.
Maxaa dhacaya haddii Degmada ama Waaxda Guryaha ee Hackney ay waajibaadkooda ka soo bixi waayaan?
Qof kasta oo shaqaalaha ka mid ah ayaad cabashadaada u soo gudbin kartaa. Sida badan dhibaatooyinka si dhakhso ah oo haboon ayaa loo xalliyaa ka dib marka si aan rasmi ahayn looga wadahadlo. Hase yeeshee haddii xal la gaari waayo waa inaad raacdaa nidaamka cabashooyinka rasmiga ah ee noo degsan. Eeg Cabashooyinka.
Gurigayga ma la iga saari karaa?
Haa, laakiin waa haddii kiradaadu dhammaato ama aad dhowri waydo shuruudaha Heshiiska Kirada oo kaliya, sida adigoo kirada bixin waaya ama deriska ku buuqa oo kale. maxkamadda oo qudha ayaa kugu amri karta inaad guriga ka baxdo. Haddii aan tallaabooyin rasmi ah qaadayno markasta waddo cad ayaan soo marnaa. Eeg Jabinta kirada iyo Kirada gurigaaga.
Waajibaadyada ugu waawayn ee na saarani waa:
- inaan kaala tashano qorshe iyo is beddel kasta oo kirada la xiriira
- inaan gurigaaga ka dhigno mid dabaysha iyo daadkaba u adkaysta oo dayactir fiican
- in ay si fiican u rakiban yihiin una shaqeynayaan dhammaan tuubooyinka, bullacadaha, majaroorka, diiriyaha, biyaha, gaaska iyo korantaduba.
Waxaan xaq u leenahay:
- inaan beddelno kirada ama kharashka kale oo aad bixisid annagoo qiimaha cusub kuu sheegayna ugu yaraan 4 usbuuc ka hor inta uusan bilaabman
- in aan helno oggolaansho aan gurigaaga ku soo galno si aan uga fulino baaritaan ama dayactir, ama qalabka ku jira aan uga shaqayno ama hagaajin ku samayno. Waa inaan ugu yaraan 24 saac ka hor kuu soo sheegnaa haddii aysan arrintu degdeg ahayn
- in aan helno sawir dhowaan ah oo aad leedahay si aan xogtaada ugu lifaaqno.
Waajibaadyada ugu waawayn ee adiga ku saarani waa:
- inaad guriga ugu noolaatid sidii guriga kaliya ee aad leedahay
- inaad kirada iyo kharashyada kaleba waqtigooda bixisid
- inaad guriga daryeeshid oo aad samaysid dayactirrada aad adigu mas’uulka ka tahay
- inaad ku dadaashid in qof kasta oo gurigaaga jooga oo ay ka mid yihiin carruurta iyo booqdayaashuba ay si xilkasnimo ah u dhaqmaan. Waa inaysan deriska buuq u keenin (sida qaylada) ama aysan u caga juglayn ama cabsi gelin dadka kale oo ay shaqaalahayagu ka midka yihiin. Arrimahaan waxaa ka mid ah hanjabaadda isir sooca ku salaysan
- inaad u haysatid oggolaansho qoraal ah wixii is beddel, hagaajin ama kordhin ah oo aad gurigaaga ku samaynaysid
- inaadan guriga dejin dad ka badan dadkii loogu talogalay
- inaad ugu yaraan 4 usbuuc ka hor noo soo sheegtid haddii aad doonaysid inaad kiradaada soo afjarto.
Waxaad xaq u leedahay:
- inaad si nabadgelyo ah gurigaaga ugu noolaatid iyadoon annaga iyo milkiilahaaguba si macno darro ah kuu soo farogelin karin
- inaad racfaan ka qaadato go’aamada aan gaarno ee aadan raalliga ka ahayn.
